Angliyaning yetakchi klublaridan biri — “Manchester Siti” joriy mavsumda yo‘qotgan gegemonligini kelgusi chempionatda tiklash niyatida. Klub rahbariyati yozgi transferlar davrida kuchli tarkib shakllantirib, Premyer-liga va Yevropa miqyosidagi turnirlarda bosh sovrinlar uchun jiddiy kurash olib borishni maqsad qilmoqda.

Xosep Gvardiolaning o‘yin uslubiga mos yosh va iqtidorli futbolchilarni tanlash uchun klub skautlari ish boshlab bo‘ldi. “CityXtra” portali tarqatgan ma’lumotlarga ko‘ra, himoya chizig‘ida jiddiy o‘zgarishlar kutilyapti.

Aynan shu maqsadda “Siti” hozirda “Udineze”da to‘p surayotgan fransiyalik himoyachi Umar Sole bilan qiziqmoqda. Uning transferi uchun klub 30 million yevro tayyorlagan. Bu futbolchiga “Liverpul” va “Chelsi” ham da’vogarlik qilmoqda.

Qizig‘i shundaki, joriy mavsum himoya chizig‘ida Manuel Akanji, Jon Stounz va Natan Ake kabi futbolchilar jarohatlar bilan kurashgani sababli, klub qishda Abduqodir Husanov va Vitor Reysni tarkibga qo‘shishga majbur bo‘lgan. Ushbu holat natijasida o‘zbek legioneri bir necha uchrashuvda asosiy tarkibda maydonga tushdi.

Abduqodirning imkoniyatlari qanday baholanmoqda?

Xosep Gvardiola yozda uni o‘zi shaxsan tayyorlab, to‘liq o‘z uslubiga moslashtirmoqchi. Murabbiy Abduqodirni kelgusidagi yangi himoya loyihasining markaziy figurasi sifatida ko‘rayotgani aytilmoqda.

Umar Soleni xarid qilish rejasi jamoa himoyasidagi raqobatni oshirishga qaratilgan bo‘lib, “Siti” tarkibdan Ake, Stounz yoki Akanjidan birini chiqarib yuborishni ham ko‘rib chiqmoqda.

Shu bilan birga, klub “Yuventus” himoyachisi Andrea Kambyasoni ham o‘z tarkibiga qo‘shish niyatida.

Yil davomida salomatlik muammolariga duch kelmagan yagona himoyachi — Yoshko Gvardiol. Uning barqaror o‘yini murabbiylar shtabi tomonidan alohida e’tirof etilgan. Shu bilan birga, bahorgi uchrashuvlarda Abduqodir Husanov bilan juftlikda Riko Lyuisning o‘yini ham ijobiy baholanmoqda.