"Real Madrid" hujumchisi Kilian Mbappe 26 aprel kuni Sevilyada bo‘lib o‘tadigan "Barselona"ga qarshi Ispaniya kubogi 2024/2025 final uchrashuviga albatta tayyor bo‘ladi. Bu haqda Ispaniyaning Tiempo de Juego nashri xabar berdi.
Manbaga ko‘ra, Mbappe o‘ng to‘pig‘idagi yengil jarohatdan so‘ng to‘liq tuzalib, safga qaytishga yaqin turibdi. Qayd etilishicha, fransiyalik futbolchi 23 aprel kuni bo‘lib o‘tadigan "qaymoqranglilar" "Xetafe"ga qarshi 33-tur uchrashuvida maydonga tushishi ham mumkin.
Oldinroq Kilian Ispaniya chempionatining 32-turidan o‘rin olgan "Atletik"ga (1:0) qarshi o‘yinni o‘tkazib yuborgandi.
Mbappe joriy mavsumda barcha turnirlarda 50 ta o‘yin o‘tkazib, 33 ta gol urdi va 5 ta golga assistentlik qildi. Futbolchining klub bilan amaldagi mehnat shartnomasi 2029 yilning yoziga qadar mo‘ljallangan.
