"Реал Мадрид" ҳужумчиси Килиан Мбаппе 26 апрель куни Севильяда бўлиб ўтадиган "Барселона"га қарши Испания кубоги 2024/2025 финал учрашувига албатта тайёр бўлади. Бу ҳақда Испаниянинг Tiempo de Juego нашри хабар берди.
Манбага кўра, Мбаппе ўнг тўпиғидаги енгил жароҳатдан сўнг тўлиқ тузалиб, сафга қайтишга яқин турибди. Қайд этилишича, франциялик футболчи 23 апрель куни бўлиб ўтадиган "қаймоқранглилар" "Хетафе"га қарши 33-тур учрашувида майдонга тушиши ҳам мумкин.
Олдинроқ Килиан Испания чемпионатининг 32-туридан ўрин олган "Атлетик"га (1:0) қарши ўйинни ўтказиб юборганди.
Мбаппе жорий мавсумда барча турнирларда 50 та ўйин ўтказиб, 33 та гол урди ва 5 та голга ассистентлик қилди. Футболчининг клуб билан амалдаги меҳнат шартномаси 2029 йилнинг ёзига қадар мўлжалланган.
