15-18-aprel kunlari Saudiya Arabistonining Dammam shahrida tashkil etilgan yengil atletika bo‘yicha U-18 yosh toifasidagi Osiyo chempionatida O‘zbekiston terma jamoasi muvaffaqiyatli ishtirok etib, 3 ta oltin, 5 ta kumush va 4 ta bronza medallarini qo‘lga kiritgani va umumjamoa hisobida ikkinchi o‘rinni egallagani haqida ma’lum qilgan edik.
Bugun ushbu musobaqa qahramonlarini pul mukofotlari bilan taqdirlash marosimi tashkil etildi.
Tadbirda Milliy Olimpiya qo‘mitasi, O‘zbekiston yengil atletika federasiyasi rahbariyati, sportchi va murabbiylar ishtirok etishdi. Sportchilarga mukofotlarni O‘zbekiston Respublikasi Bojxona qo‘mitasi va mamlakat yengil atletika federasiyasi raisi Akmalxo‘ja Mavlonov hamda MOQ raisining birinchi o‘rinbosari Otabek Umarov tantanali ravishda topshirishdi.
Ta’kidlash joiz, shu kunlarda Toshkentda kattalar va 20 yoshgacha bo‘lgan sportchilar o‘rtasida O‘zbekiston chempionati tashkil etilmoqda. Rasmiylar musobaqa jarayonini kuzatish bilan birga qit’a birinchiligida yurtimiz sharafini munosib himoya qilgan yosh atletlarimizni qutlashdi. Ularni qo‘lga kiritgan muvaffaqiyatlari bilan tabriklab, kelgusi faoliyatlarida ham omad tilashdi.
