Milanning "Inter" klubi bosh murabbiyi yordamchisi Massimiliano Farris A Seriya chempionlik poygasidagi vaziyat haqida berilgan savolga javob qaytardi.

Shanba kuni "Napoli" "Lechche"ni minimal hisobda mag‘lub etgan bo‘lsa, biroz o‘tib "Inter" xuddi shu hisobda "Verona"ni taslim etdi. Antonio Konte jamoasi finishga 3 tur qolganida "neradzurrilar"ni 3 ochkoga ortda qoldirib, peshqadamlikni davom ettirmoqda.

"Endi to‘p "Napoli"da. Bugun yuqori o‘rin uchun kurashni davom ettirish uchun yaxshi o‘yin o‘tkazib, g‘alaba qozonishni istadik. Skudetto poygasining taqdiri endi o‘zimizga bog‘liq emas, ammo "Napoli" qoqilsa, bunga tayyor turishimiz kerak," - deya Simone Indzagining yordamchisi Farrisning so‘zlarini keltiradi "Inter" matbuot xizmati.