Leverkuzenning "Bayer" klubi jamoaning amaldagi bosh murabbiyi Xabi Alonsoning o‘rniga o‘rinbosar qidirmoqda. Mutaxassis tez orada “Real” bilan shartnoma imzolashi kutilmoqda.
Alonso 2022 yildan buyon "dorichilar"ni boshqarib keladi va ularni bir martadan Germaniya chempionati, kubogi va Superkubogida g‘alabaga olib kelgan.
“Bayer”ni boshqarishga asosiy nomzod italiyalik “Komo” klubining amaldagi ustozi Sesk Fabregas hisoblanadi. SportBILD xabariga ko‘ra, "Brayton"dan Fabian Xyurseler bilan ham variant ko‘rib chiqilmoqda.
Premyer-ligadagi eng yosh murabbiy hisoblangan Xyurseler "Bayer" rahbariyatining barcha talablariga javob bersa-da, uning transferi moliyaviy sabablarga ko‘ra dargumon.
