Uchrashuvda, O‘FA birinchi vise-prezidenti Ravshan Irmatov o‘zbek futbolining tarixi, Prezident tashabbusi bilan qad rostlayotgan Milliy futbol markazining faoliyati hamda so‘nggi yillarda amalga oshirilayotgan islohotlar bilan tanishtirib, assosiasiya ikki mamlakat futbolining rivoji yo‘lida hamkorlik qilishga tayyor ekanligini ma’lum qildi.
Shuningdek, ayollar va bolalar futbolini rivojlantirish, ikki mamlakat futboli mutaxassislari ishtirokida tajriba almashish maqsadida turli seminarlar o‘tkazish masalalari muhokama qilindi. Futbol ta’limi, texnologiyalar va sport tibbiyoti yo‘nalishlarida hamkorlik dasturlarini ishlab chiqish bo‘yicha fikr almashildi.
Bundan tashqari, Niderlandiyaning yetakchi klublaridan biri bo‘lgan “PSV Eindhoven” vakillari bilan onlayn uchrashuv tashkil etish, iqtidorli futbolchilarni aniqlash tizimini samarali yo‘lga qo‘yish va bu borada muzokaralar olib borish muhimligi ta’kidlandi.
