Madridning «Real» jamoasi «Benfika» klubi tarkibida to‘p surgan chap qanot himoyachisi Alvaro Karrerasni xarid qilish jarayonini yakunlamoqda. Bu haqda AS nashri xabar berdi.

Manba ma’lumotiga ko‘ra, futbolchi faoliyatini Madridda davom ettirishi aniq, transfer bo‘yicha so‘nggi tafsilotlargina qolgan. Avvalroq xabar qilinganidek, ispaniyalik himoyachining shartnomasida 50 million yevroga teng to‘lov miqdori belgilangan, ammo «qirollik klubi» bu to‘lovni amalga oshiradimi yoki futbolchi uchun kamroq mablag‘ to‘laydimi — hozircha noma’lum.

Joriy mavsumda Karreras barcha musobaqalarda 48ta o‘yinda qatnashib, 4ta gol urdi va 5ta golli pas muallifiga aylandi. Uning klub bilan tuzgan amaldagi shartnomasi 2029 yil yozigacha mo‘ljallangan. Transfermarkt portali ma’lumotiga ko‘ra, futbolchining bozor bahosi 28 million yevroga teng.