Xarri Keyn Bundesligada mavsumning eng yaxshi futbolchisi sovrinini qo‘lga kiritganidan so‘ng o‘z his-tuyg‘ulari bilan o‘rtoqlashdi.

31 yoshli angliyalik forvard "Bavariya" bilan chempion bo‘ldi - bu uning faoliyatidagi birinchi sovrin. Xarri, shuningdek, 31 o‘yinda 26 gol va 8 golli uzatma bilan ketma-ket ikkinchi yil Bundesliganing eng yaxshi to‘purari bo‘ldi. U gol+pas tizimida yetakchi hisoblanadi.

Bugun Keyn Germaniya chempionatining 2024/25 yilgi mavsumining eng yaxshi futbolchisi deb topildi.

"Mavsumning eng yaxshi futbolchisi deb topilganim ajoyib tuyg‘u. Men bu yutuqdan faxrlanaman, chunki Bundesligadagi raqobat juda og‘ir.

Biz chempionlik unvonini qo‘lga kiritgan mavsumda mukofotni olishimiz buni yanada o‘ziga xos qiladi. Bu men uchun juda ko‘p narsani anglatadi. Men klubga, jamoadoshlarimga va barcha xodimlarga rahmat aytmoqchiman - ularsiz buning iloji bo‘lmasdi.

Endi esa bundan zavqlanaman, chunki mavsum davomida barchamiz qattiq mehnat qildik. Bu mukofotlar yana bir yoqimli bonus" - dedi Keyn.