Харри Кейн Бундеслигада мавсумнинг энг яхши футболчиси совринини қўлга киритганидан сўнг ўз ҳис-туйғулари билан ўртоқлашди.

31 ёшли англиялик форвард "Бавария" билан чемпион бўлди - бу унинг фаолиятидаги биринчи соврин. Харри, шунингдек, 31 ўйинда 26 гол ва 8 голли узатма билан кетма-кет иккинчи йил Бундеслиганинг энг яхши тўпурари бўлди. У гол+пас тизимида етакчи ҳисобланади.

Бугун Кейн Германия чемпионатининг 2024/25 йилги мавсумининг энг яхши футболчиси деб топилди.

"Мавсумнинг энг яхши футболчиси деб топилганим ажойиб туйғу. Мен бу ютуқдан фахрланаман, чунки Бундеслигадаги рақобат жуда оғир.

Биз чемпионлик унвонини қўлга киритган мавсумда мукофотни олишимиз буни янада ўзига хос қилади. Бу мен учун жуда кўп нарсани англатади. Мен клубга, жамоадошларимга ва барча ходимларга раҳмат айтмоқчиман - уларсиз бунинг иложи бўлмасди.

Энди эса бундан завқланаман, чунки мавсум давомида барчамиз қаттиқ меҳнат қилдик. Бу мукофотлар яна бир ёқимли бонус" - деди Кейн.