"Manchester Yunayted" "Milan" va Fransiya terma jamoasi darvozaboni Mayk Menyanni o‘z safiga qo‘shib olish masalasini faol o‘rganmoqda. Bu haqda taniqli insayder Nikolo Skira o‘z ijtimoiy tarmoqlarida ma’lum qildi.

Uning ma’lumotiga ko‘ra, ingliz klubi 29 yoshli darvozabonning holati yuzasidan rasmiy so‘rov yuborgan. "Qizil iblislar" safida darvoza chizig‘ida jiddiy o‘zgarishlar bo‘lishi istisno etilmayapti - avvalroq Andre Onana va Altay Bayindir shu yozdayoq jamoani tark etishi mumkinligi xabar qilingandi.

Menyan mavsumni "rossonerilar" safida o‘tkazdi va barcha musobaqalarda 52 ta o‘yin o‘tkazib, 14 marta o‘z darvozasi daxlsizligini saqlab qoldi. Uning "Milan" bilan shartnomasi 2026 yilning yozigacha mo‘ljallangan bo‘lib, transfermarkt talqiniga ko‘ra, uning transfer narxi 25 mln yevroga baholanmoqda.