"Real Madrid" yaqin vaqt ichida "Benfika"ning chap qanot himoyachisi Alvaro Karrerasning transferini yakunlamoqchi. Bu haqda Marca xabar bermoqda.

Manbaga ko‘ra, "Los-blankos" 22 yoshli futbolchi bilan allaqachon kelishuvga erishgan va ispaniyalik kelasi dushanba, 2 iyun kuni jamoa bilan mashg‘ulotlarga qo‘shilishi uchun uning shartnomasini shu hafta yakunlamoqchi.

Qayd etilishicha, Madridning “Real” klubi o‘z tarbiyalanuvchisini 15 iyun kuni boshlanadigan klublar o‘rtasidagi jahon chempionatida ishtirok etishi uchun yaqin vaqt ichida qaytarib olmoqchi. Avvalroq bu shoshqaloqlik “Benfika” bilan muzokaralarni murakkablashtirgani haqida xabar berilgandi.

Biroq, Marca nashrining yozishicha, Karreras bilan shartnoma imzolanishi sanoqli kunlar masalasidir, "Real" shartnomani imzolash uchun 50 million yevro tovon puli to‘lashga tayyor.

Joriy mavsumda himoyachi Portugaliya chempionatida 32 ta o‘yin o‘tkazib, 3 ta gol urdi va bitta golli uzatmani amalga oshirdi.