"Реал Мадрид" яқин вақт ичида "Бенфика"нинг чап қанот ҳимоячиси Альваро Каррераснинг трансферини якунламоқчи. Бу ҳақда Marca хабар бермоқда.
Манбага кўра, "Лос-бланкос" 22 ёшли футболчи билан аллақачон келишувга эришган ва испаниялик келаси душанба, 2 июнь куни жамоа билан машғулотларга қўшилиши учун унинг шартномасини шу ҳафта якунламоқчи.
Қайд этилишича, Мадриднинг “Реал” клуби ўз тарбияланувчисини 15 июнь куни бошланадиган клублар ўртасидаги жаҳон чемпионатида иштирок этиши учун яқин вақт ичида қайтариб олмоқчи. Аввалроқ бу шошқалоқлик “Бенфика” билан музокараларни мураккаблаштиргани ҳақида хабар берилганди.
Бироқ, Marca нашрининг ёзишича, Каррерас билан шартнома имзоланиши саноқли кунлар масаласидир, "Реал" шартномани имзолаш учун 50 миллион евро товон пули тўлашга тайёр.
Жорий мавсумда ҳимоячи Португалия чемпионатида 32 та ўйин ўтказиб, 3 та гол урди ва битта голли узатмани амалга оширди.
