“Барселона” футболчиси Ламин Ямал “Реал”нинг ҳакамлик борасидаги эътирозларига жавоб қайтарди. Испаниялик футболчи мадридликларнинг сўнгги йиллардаги натижаларига ишора қилиб, жамоанинг Ла Лигада чемпион бўла олмаётгани ўз муаммоси эканини айтди.
“ ‘Реал’ икки йилдан бери Ла Лигада ғолиб бўла олмаётган бўлса, бу уларнинг муаммоси. Биз эса ҳозирча ҳакамликдан ҳам, умуман олганда, барча нарсадан мамнунмиз”, деди Ямал.
Эслатиб ўтамиз, “қироллик клуби” Ла Лиганинг 4-турида “Бетис”га 0:1 ҳисобида мағлуб бўлди. Учрашувдан сўнг Мадрид клуби бош мураббийи Жозе Моуриньо ҳакамларнинг қарорларидан норозилигини билдирди.
Маълумот ўрнида, “Реал” охирги марта 2024-йилда Испания чемпионлигини қўлга киритган. Жамоа ўтган мавсумни ҳам йирик совринсиз якунлаган. 2025 ва 2026-йилларда эса Ла Лига чемпионлиги “Барселона”га насиб этди.
Ямал 2023-йилдан буён “Барселона” сафида тўп тепмоқда. 18 ёшли футболчи каталонияликлар билан уч марта Испания чемпиони бўлган. Шунингдек, унинг ҳисобида Испания Кубоги ва икки марта мамлакат Суперкубогидаги ғолиблик мавжуд.
