“Barselona” futbolchisi Lamin Yamal “Real”ning hakamlik borasidagi e’tirozlariga javob qaytardi. Ispaniyalik futbolchi madridliklarning so‘nggi yillardagi natijalariga ishora qilib, jamoaning La Ligada chempion bo‘la olmayotgani o‘z muammosi ekanini aytdi.

“ ‘Real’ ikki yildan beri La Ligada g‘olib bo‘la olmayotgan bo‘lsa, bu ularning muammosi. Biz esa hozircha hakamlikdan ham, umuman olganda, barcha narsadan mamnunmiz”, dedi Yamal.

Eslatib o‘tamiz, “qirollik klubi” La Liganing 4-turida “Betis”ga 0:1 hisobida mag‘lub bo‘ldi. Uchrashuvdan so‘ng Madrid klubi bosh murabbiyi Joze Mourinyo hakamlarning qarorlaridan noroziligini bildirdi.

Ma’lumot o‘rnida, “Real” oxirgi marta 2024-yilda Ispaniya chempionligini qo‘lga kiritgan. Jamoa o‘tgan mavsumni ham yirik sovrinsiz yakunlagan. 2025 va 2026-yillarda esa La Liga chempionligi “Barselona”ga nasib etdi.

Yamal 2023-yildan buyon “Barselona” safida to‘p tepmoqda. 18 yoshli futbolchi kataloniyaliklar bilan uch marta Ispaniya chempioni bo‘lgan. Shuningdek, uning hisobida Ispaniya Kubogi va ikki marta mamlakat Superkubogidagi g‘oliblik mavjud.