Mamlakatimizdagi futbol akademiyalarini baholash maqsadida OFK delegasiyasi tashrif buyurgani haqida xabar bergan edik.

O‘FA rahbariyati Osiyo Futbol Konfederasiyasi texnik direktori o‘rinbosari Takeshi Ono bilan uchrashdi.

Uchrashuvda “Elite youth” dasturi bo‘yicha hududiy futbol akademiyalarini rivojlantirish masalalari va bu borada amalga oshirilgan ishlar, texnik direktorlarning bolalar futbolidagi ahamiyati, Milliy futbol markazida barpo etilayotgan Respublika futbol akademiyasi faoliyati bo‘yicha muhim masalalar muhokama qilindi.

O‘zbekiston futbol assosiasiyasi birinchi vise-prezidenti Ravshan Irmatov so‘nggi yillarda mamlakatimizda futbol akademiyalari faoliyati tizimli ravishda rivojlanayotgani va bolalar futboliga qaratilayotgan e’tibor yildan-yilga o‘sib borayotganini ta’kidladi.

Ayni kunlarda OFK tomonidan «Nasaf» hamda «Bunyodkor» futbol klublari akademiyalari Ikki yulduzli daraja, shuningdek Andijon futbol akademiyasi Bir yulduzli daraja bilan qayta baholandi.

O‘zbek futboli rivoji yo‘lida ushbu tashrif katta ahamiyatga ega bo‘lib, mamlakatimiz futbol akademiyalarining sifat darajasini xalqaro standartlar asosida baholash imkonini beradi.