Simone Indzagi ketganidan keyin "Inter" bosh murabbiyi etib tayinlanishi bilan faol bog‘langan "Komo" bosh murabbiyi Sesk Fabregas "Komo"dagi ishiga to‘liq e’tibor qaratishini va klubning ulkan loyihasiga ishonishini ta’kidladi.
"Inter" qiziqish bildirayotganiga qaramay, "Komo" rahbariyati ispaniyalik murabbiyni qo‘yib yuborish niyatida emas. Klub prezidenti Mirvan Suvarso Fabregas "klubni tark etmasligini" aytdi.
"Men "Komo" loyihasiga juda ishonaman. Men bu yerga uzoq muddatli ish bilan umid qilganim uchun keldim. Loyiha bir yoki ikki mavsum bilan chegaralangan klubda faoliyatimni yakunlashni xohlamadim.
Men bu yerda o‘yinchi sifatida ish boshlaganman va endi o‘zim xohlagandek ishlay olishimdan juda xursandman. Prezident bilan mening maqsad va ambisiyalarimiz bir. U menga qarashlarimga muvofiq harakat qilish erkinligini beradi. Yaxshiyamki, biz bir yo‘nalishda va bir maqsad sari intilamiz - imkon qadar ko‘proq erishish uchun.
Biz kichik shaharda, kamtarona klubda bo‘lsa-da, lekin kelajakka juda katta ambisiyalarga ega bo‘lgan yaxshi jamoaga aylandik", - dedi Fabregas La Gazzetta dello Sport bilan suhbatda.
3 iyun kuni Simone Indzagi "Inter" bosh murabbiyi lavozimini tark etayotgani ma’lum bo‘ldi.
