Jahon Shaxmat Federasiyasi may oyi yakunlangach, o‘z reytingini yangiladi. Yangilangan reytingda kuchli 100 talik ro‘yxatga 5 nafar o‘zbekistonlik grossmeyster kirishni uddaladi.

Dunyoning birinchi raqamli shaxmatchisi, norvegiyalik Magnus Karlsen hamon reytingda yetakchi hisoblanadi. Uning hisobida 2837 ochko mavjud. Ikkinchi pog‘onadan Hikaru Nakamura (2804) joy olgan bo‘lsa, kuchli uchlikka Erigaisi Arjun yakun yasagan.  May oyidagi reytingda Nodirbek Abdusattorov o‘z o‘rni saqlanib qolmoqda. U 6-o‘rinda qayd etilgan bo‘lib, hisobidagi ochkolar soni 2767 ballni tashkil qiladi.

Javohir Sindorov yangilangan reytingda 29-o‘rinni egalladi. Uning hisobida 2710 ochko mavjud.

Eng kuchli shaxmatchilar qatoridan Rustam Qosimjonov ham joy olgan. U 2675 ochko bilan 47-pog‘onani egalladi. Shuningdek, Nodirbek Yakubboyev 65-pog‘onadan (2659 ochko), Shamsiddin Vohidov esa 81-o‘rindan (2644 ochko) joy oldi.

Yoshlar reytingida esa Javohir Sindorov 2710 ochko bilan kuchli uchlikda qoldi.