"Atalanta" yarim himoyachisi Ederson Italiyaning boshqa jamoasiga o‘tishi mumkin, deya xabar bermoqda insayder Janluka di Marsio.
Manbaga ko‘ra, braziliyalik xavbekni jamoaning o‘rta chizig‘ini kuchaytirish harakatida bo‘lgan Turinning "Yuventus" klubi o‘z safiga qo‘shib olmoqchi. 25 yoshli Ederson o‘tgan mavsum Italiya chempionatida 37ta o‘yinda maydonga tushib, 4ta gol urgan va shuncha golga hammualliflik qilgan.
Yarim himoyachi 2022 yilning yozidan beri "Atalanta" sharafini himoya qilmoqda. Edersonning bergamoliklar bilan amaldagi shartnomasi 2027 yil iyun oyi oxirida tugaydi. Transfermarkt portali futbolchining bozor narxini 50 million yevroga baholamoqda.













