Yaqinda "Manchester Siti"ga o‘tgan fransiyalik yarim himoyachi Rayan Sherki o‘tgan mavsumda "Lion"da o‘tkazgan o‘yinlari haqida fikr bildirdi.

"Menimcha, bu mening eng yaxshi mavsumim bo‘ldi. Odamlar nihoyat mening futbolim haqida gapira boshlashdi - uzatmalar, dribling, men haqiqatan ham kuchli bo‘lgan narsalar haqida. Ilgari duch kelgan asossiz tanqidlarni endi eshitmayapman. Bunday bosimga bardosh berib, xotirjamlikni saqlab qolish hammaning ham qo‘lidan kelavermaydi. Men o‘zimdan mamnunman, garchi 18 baravar yaxshiroq bo‘lishim mumkinligini bilsam ham. Hozir bir istagim bor - o‘ynash. Shunchaki maydonda bo‘lish," - deya Sherkining so‘zlarini keltiradi City Xtra.

2024/25 yilgi mavsumda Sherki 44 ta o‘yinda maydonga tushib, 12 ta gol urdi va 20 ta golli uzatmani amalga oshirdi.