Bugun, 18 iyun kuni, AQSHning Filadelfiya shahrida joylashgan «Linkoln Faynenshel Fild» stadionida 2025 yilgi klublar o‘rtasidagi jahon chempionatining G guruhi 1-turidan o‘rin olgan uchrashuv bo‘lib o‘tdi. Unda Angliyaning «Manchester Siti» jamoasi Marokashning «Vidad» klubini 2:0 hisobida mag‘lub etdi.

Uchrashuvning ikkinchi daqiqasida Filip Foden hisobni ochdi, 42-daqiqada esa Jeremi Doku ikkinchi golni kiritdi. Golga Foden assistentlik qildi. 88-daqiqada «Siti» himoyachisi Riko Lyuis maydondan chetlatildi.

Angliya klubi safida Teyani Reynders va Rayan Sherki debyut qilishdi. Ular asosiy tarkibda maydonga tushishdi — gollandiyalik yarim himoyachi butun uchrashuvni o‘tkazdi, fransiyalik futbolchi esa 60-daqiqada almashtirildi. Ikkinchi taymda Foden o‘rniga Rodri maydonga tushdi. Bu uning tizzasidagi jarohatdan so‘ng ikkinchi o‘yini edi.

O‘zbekistonlik himoyachi Abduqodir Husanov qaydnomaga kiritildi, ammo u maydonga tushirilmadi.

G guruhidagi navbatdagi uchrashuvda Xosep Gvardiola shogirdlari 23 iyun kuni BAAning «Al-Ayn» klubiga qarshi bahs olib boradi. «Vidad» esa bir kun avval Italiyaning «Yuventus» jamoasiga qarshi o‘ynaydi.

2025 yilgi futbol bo‘yicha klublar o‘rtasidagi jahon chempionati 15 iyundan 13 iyulgacha AQSHda bo‘lib o‘tadi. Musobaqada 32 ta klub qatnashmoqda. Ular sakkizta guruhga ajratilgan va har bir guruhda to‘rttadan jamoa joy olgan. Har bir guruhdan ikkidan kuchli jamoa pley-off bosqichiga yo‘l oladi.

Klublar o‘rtasidagi jahon chempionati – 2025
G guruhi. 1-tur
2025 yil 18 iyun, chorshanba.
Manchester Siti (Manchester, Angliya) — 2:0 — Vidad (Kasablanka, Marokash)
Gollar: 1:0 — Foden, 2'; 2:0 — Doku, 42' (assist — Foden)
Qizil kartochka: Riko Lyuis («Manchester Siti») — 88'