Toshkent tumanidagi "Universal" sport majmuasida karate WKF bo‘yicha o‘tkazilgan "Keles Open" oltinchi an’anaviy xalqaro turnirida 700 nafardan ziyod yosh sportchilar g‘oliblik uchun kurash olib bordi.
O‘zbekiston Respublikasi Prezidentining "Karate (WKF) sport turini yanada rivojlantirish chora-tadbirlari to‘g‘risida"gi qarori ijrosini ta’minlash hamda iqtidorli sportchilarni saralash orqali terma jamoalarga munosib nomzodlarni aniqlash maqsadida tashkil etilgan musobaqada mamlakatimiz hududlaridan hamda qo‘shni Qozog‘iston va Tojikiston davlatlaridan 4 yoshdan 18 yoshgacha va 18 yoshdan katta bo‘lgan 700 nafardan ziyod karatechilar bahslarda ishtirok etdi.
Xalqaro turnirning tantanali ochilish marosimida ishtirok etgan Toshkent tumani hokimi Sardorbek Ergashev, O‘zbekiston davlat jismoniy tarbiya va sport universiteti Jangovar yakkakurash sport turlari nazariyasi va uslubiyati kafedrasi mudiri Shuhrat Arslonov xalqaro musobaqalarda yuqori natijalarga erishib kelayotgan bir guruh yosh karatechilarga esdalik sovg‘alari topshirdi.
Chinakam sport bayrami ko‘rinishini olgan xalqaro turnir bahslarini tajribali karate mutaxassislari Dilshod Yusupov, Bekzod Abdulhamidov, Sanjar Maqsudov, Xurshid Shodibekov yetakchiligidagi 30 nafar hakamlar boshqarib bordi.
Murosasiz bellashuvlarning natijalariga ko‘ra, umumjamoa hisobida Toshkent viloyati jamoasi 1-o‘rinni qo‘lga kiritgan bo‘lsa, keyingi pog‘onalarni Sirdaryo, Toshkent shahri va Xorazm viloyati jamoalari egalladi.
