Тошкент туманидаги "Универсал" спорт мажмуасида каратэ WKF бўйича ўтказилган "Keles Open" олтинчи анъанавий халқаро турнирида 700 нафардан зиёд ёш спортчилар ғолиблик учун кураш олиб борди.
Ўзбекистон Республикаси Президентининг "Каратэ (WKF) спорт турини янада ривожлантириш чора-тадбирлари тўғрисида"ги қарори ижросини таъминлаш ҳамда иқтидорли спортчиларни саралаш орқали терма жамоаларга муносиб номзодларни аниқлаш мақсадида ташкил этилган мусобақада мамлакатимиз ҳудудларидан ҳамда қўшни Қозоғистон ва Тожикистон давлатларидан 4 ёшдан 18 ёшгача ва 18 ёшдан катта бўлган 700 нафардан зиёд каратэчилар баҳсларда иштирок этди.
Халқаро турнирнинг тантанали очилиш маросимида иштирок этган Тошкент тумани ҳокими Сардорбек Эргашев, Ўзбекистон давлат жисмоний тарбия ва спорт университети Жанговар яккакураш спорт турлари назарияси ва услубияти кафедраси мудири Шуҳрат Арслонов халқаро мусобақаларда юқори натижаларга эришиб келаётган бир гуруҳ ёш каратэчиларга эсдалик совғалари топширди.
Чинакам спорт байрами кўринишини олган халқаро турнир баҳсларини тажрибали каратэ мутахассислари Дилшод Юсупов, Бекзод Абдулҳамидов, Санжар Мақсудов, Хуршид Шодибеков етакчилигидаги 30 нафар ҳакамлар бошқариб борди.
Муросасиз беллашувларнинг натижаларига кўра, умумжамоа ҳисобида Тошкент вилояти жамоаси 1-ўринни қўлга киритган бўлса, кейинги поғоналарни Сирдарё, Тошкент шаҳри ва Хоразм вилояти жамоалари эгаллади.
