Toshkentda ayol hakamlar uchun FIFA seminari boshlandi.
Ushbu seminarda 24 nafar ayol hakam – 8 nafar bosh hakam, 11 nafar yordamchi hakam va 5 nafar "Hakamlar akademiyasi" tinglovchilari ishtirok etmoqda.
O‘zbekiston futbol assosiasiyasi birinchi vitse-prezidenti Ravshan Ermatov ayol hakamlarning futboldagi o‘rni tobora kuchayib borayotganini ta’kidladi. U har bir hakam o‘z ustida doimiy ishlashi, chet tillarini o‘rganishi lozimligini ta’kidladi. Shunda ular zamonaviy hakam sifatida shakllanishi mumkinligini qayd etdi. Shuningdek, seminarda ishtirok etayotgan hakamlar FIFA instruktorlari Rodzali Yakub Muhammad, Ali Traifi va rossiyalik tajribali ayol hakam Anastasiya Pustovoytova tomonidan berilayotgan tavsiyalarni diqqat bilan tinglashi, faol qatnashishi va savollar orqali o‘z malakalarini oshirib borishi muhimligi aytib o‘tildi. Ravshan Ermatov barcha ishtirokchilarga seminar davomida omad tiladi.
O‘FA texnik direktori Gi Kiala seminar orqali hakamlar nazariy bilim va amaliy ko‘nikmalarini oshirib, kelgusida milliy va xalqaro maydonlarda faol ishtirok etishlariga ishonch bildirdi.
Rodzali Yakub Muhammad va Anastasiya Pustovoytova seminar qatnashchilariga muvaffaqiyat tiladi. Shuningdek, ishtirokchilarga o‘z bilim, tajriba va ko‘nikmalari asosida tavsiyalar berishini ta’kidlab o‘tdi.
Seminar davomida hakamlar uchun nazariy va amaliy mashg‘ulotlar tashkil etilishi rejalashtirilgan. Shuningdek, FIFA instruktorlari Ali Traifi va Anastasiya Pustovoytova tomonidan "Hakamlar akademiyasi"da tahsil olayotgan yosh hakamlarga hakamlik faoliyatining asosiy tamoyillari bo‘yicha ma’ruzalar o‘qib beriladi.
Ma’lumot uchun, seminar 30 iyunga qadar davom etadi.
