Yozgi transfer oynasida tarkibni kuchaytirishni maqsad qilgan “Andijon” PFK seleksiya ishlarini izchil davom ettirmoqda. Jamoa tarkibiga bir qator iqtidorli futbolchilar qo‘shildi.

Klub “Paxtakor” tarbiyalanuvchilari Muhammadali Usmonov va Saidumarxon Saidnurillayev, shuningdek, iste’dodli hujumchi Otabek Jo‘raqo‘ziyev bilan shartnoma imzoladi.

Muhammadali Usmonov 2004 yil 9 dekabr kuni Andijonda tavallud topgan. U “Paxtakor”ning U18, U21 va asosiy jamoalari safida to‘p surgan. Joriy mavsumning birinchi yarmida “Paxtakor” uchun 2 ta o‘yinda maydonga tushib, 1 ta gol urgan. Qiziqarlisi, bosh murabbiy Maksim Shaskix “Paxtakor”da ishlagan paytida aynan Usmonovni birinchi bo‘lib kashf etgan.

Saidumarxon Saidnurillayev esa 2005 yil 13 aprelda Andijon viloyatida tug‘ilgan. U ham “Paxtakor” tarbiyalanuvchisi bo‘lib, 2023 yildan buyon “sherlar” safida to‘p surdi. Joriy mavsumning birinchi qismida 1 ta o‘yinda ishtirok etib, 2 ta gol va 1 ta golli pas muallifiga aylandi.

Otabek Jo‘raqo‘ziyev esa 2002 yil 2 aprel kuni Farg‘ona viloyatida tug‘ilgan. U “Bunyodkor farm”, “Olimpik” va “Paxtakor” jamoalarida o‘ynagan. Joriy mavsumda “Paxtakor” safida 13 ta o‘yinda 3 ta gol urgan. Shuningdek, O‘zbekiston U23 terma jamoasida 26 ta o‘yin o‘tkazib, 6 ta gol kiritgan. U “Andijon”da mavsum oxiriga qadar ijara asosida to‘p suradi.