"Monako" bosh murabbiyi Adi Xyutter "Koventri"ga (5:0) qarshi o‘rtoqlik o‘yinidan so‘ng yangi kelgan Pol Pogba va Ansu Fati qachon maydonga tushishini aytdi.

"Fati va Pogba o‘z jismoniy holati ustida ishlamoqda. Menimcha, Ansu jamoaga qo‘shilishga biroz yaqinroq. "Barselona"da u kerakli darajada ishlay olmadi. Biz uni avvalgi holatiga qaytarishga harakat qilyapmiz, lekin buni juda erta qila olmaymiz. Biz ehtiyotkormiz. Ikkalasi ham o‘ynashga chanqoq. Ular yaqin haftalarda bunga yaqin bo‘ladi," - deya Xyutterning so‘zlarini keltiradi L’Equipe.

"Monako" yozda "Barselona"dan hujumchi Ansu Fatini ijaraga olgani va doping tufayli diskvalifikasiya muddatini o‘tab bo‘lgan yarimhimoyachi Pol Pogba bilan shartnoma imzolaganini e’lon qildi.