«Kristal Pelas» tarkibi yangi futbolchi bilan to‘ldirildi – ispaniyalik qanot himoyachisi Oskar Mingesa ingliz jamoasi bilan mehnat shartnomasini imzoladi. Bu haqda «burgutlar»ning rasmiy sayti xabar berdi.

Mingesa «Kristal Pelas» safiga erkin agent sifatida kelib qo‘shildi. Futbolchi to‘rt yilga mo‘ljallangan shartnomani imzoladi.

27 yoshli ispaniyalik himoyachi «Barselona» tarbiyalanuvchisi hisoblanadi. 2020–2022-yillarda Mingesa «ko‘k-anorranglilar» asosiy tarkibida to‘p surgan. Himoyachi so‘nggi to‘rt mavsumni «Selta» safida o‘tkazib, ushbu jamoa tarkibida 147 ta o‘yin o‘tkazdi va «gol+pas» tizimi bo‘yicha 22 ochko to‘pladi.

Eslatib o‘tamiz, Angliya premyer-ligasining yangi mavsumi 21-avgust kuni boshlanadi.