Yana bir necha daqiqalardan so‘ng (Toshkent vaqti bilan soat 12:00) Malayziyaning Kuala Lumpur shahridagi OFK binosida Jahon chempionati-2026 4-bosqichi uchun qur’a tashlash marosimi bo‘lib o‘tadi.

Osiyoga ajratilgan 8 ta to‘g‘ridan-to‘g‘ri yo‘llanmaning 6 tasi allaqachon o‘z egalarini topgan. Uchinchi saralash bosqichida o‘z guruhlarida uchinchi va to‘rtinchi o‘rinni egallagan jamoalar — Indoneziya, Iroq, Ummon, Qatar, Saudiya Arabistoni va BAA pley-off orqali yana bir imkoniyatga ega bo‘lishadi. Bu o‘yinlar 8 oktabrdan 14 oktabrga qadar bo‘lib o‘tadi.

Jamoalar uchtadan ikki guruhga bo‘linadi. Faqatgina guruh g‘oliblari 2026-yilgi JCHga yo‘l oladi. Har bir guruh markazlashtirilgan maydonda (Qatar va Saudiya Arabistoni mezbonlik qiladi) yagona davra tizimida o‘ynaladi.

Qura tashlash uchun savatchalar (FIFA reytingiga ko‘ra):

1-savat: Qatar (FIFA reytingi: 53), Saudiya Arabistoni (58)

2-savat: Iroq (59), Birlashgan Arab Amirliklari (66)

3-savat: O‘mon (79), Indoneziya (118)

Eslatma: Mezbon davlatlar bo‘lgan Qatar va Saudiya Arabistoni qur’a natijasida turli guruhlarga joylashtiriladi.

Pley-off guruh bosqichi yakunlangach, har bir guruhda ikkinchi o‘rinni egallagan jamoalar 13 va 18 noyabr kunlari ikki o‘yinli pley-offda to‘qnash kelishadi. Bu nokaut bosqichi qit’aning FIFA qit’alararo pley-off turniridagi vakilini aniqlab beradi.