"Barselona" bosh murabbiyi Xans-Diter Flikka jamoaning "Kamp Nou"ga qaytishi yana ortga surilayotgani haqida xabar berildi. Rekonstruksiyani yana o‘z vaqtida yakunlashga ulgurishmadi, shuning uchun "ko‘k-anorranglilar" yaqin vaqt ichida o‘z stadionida o‘ynay olmaydi. Kataloniyaliklar yangi yil boshlanguncha o‘z uy uchrashuvlarini "Monjuik"da o‘tkazishi ham ehtimoldan xoli emas. Jurnalist Xavi Migelning so‘zlariga ko‘ra, klub bu haqda Flikka xabar bergan - u bundan hayratda qolgan.

Germaniyalik murabbiy o‘tgan mavsum avvalida o‘z lavozimini egallagan edi. Jamoa mavsumni ajoyib tarzda o‘tkazdi, La Liga, Ispaniya kubogi va mahalliy Superkubokda g‘olib chiqdi va Chempionlar Ligasi yarim finaliga chiqdi.