Bu yozda "Real Madrid" yangi o‘yinchilarga katta miqdorda sarmoya kiritdi. "Qaymoqranglilar" tarkibini Din Xyoysen (“Bornmut”), Alvaro Karreras (“Benfika”) va Trent Aleksander-Arnold (“Liverpul”) kabu futbolchilar bilan kuchaytirgan bo‘lsa, avgust oyida Xabi Alonso jamoasiga Franko Mastantuono (“River Pleyt”) qo‘shiladi.
Umuman olganda, "Real Madrid" transferlar uchun taxminan 178 million yevro sarfladi va bu 2019 yilning yozidan buyon klubning eng qimmat transfer oynasiga aylandi. O‘tgan mavsumda Madrid grandi "Barselona"ga La Liga chempionligini boy berdi, shuningdek, Ispaniya kubogi va Ispaniya Superkubogi finalida kataloniyaliklarga mag‘lub bo‘ldi. Chempionlar ligasida jamoa chorak finalgacha yetib bordi va u yerda “Arsenal”dan mag‘lub bo‘lgan bo‘lsa, yaqinda bo‘lib o‘tgan klublar o‘rtasidagi jahon chempionatida “PSJ”ga yutqazdi.
