Niderlandiya terma jamoasi va "Inter" klubining sobiq futbolchisi Uesli Sneyder "Oltin to‘p" sovrini masalasida o‘z fikrlarini bildirib o‘tdi.
Lionel Messi mukofotni qo‘lga kiritgan 15 yil oldingi voqealarni sharhlar ekan, Sneyder Winwin portaliga bergan intervyusida quyidagilarni ta’kidladi:
"O‘sha yil men uchun o‘ziga xos mavsum bo‘lgandi. Chempionlar ligasi, Jahon chempionati finali, 2 ta ichki chempionlik. Men bor kuchimni sarflagandim. Yakunda sovrinni olmaganimdan xafa bo‘lganman".
Sneyder 2013 yilda Frank Riberi va 2020 yilda Robert Levandovskini misol qilib, "Oltin to‘p" har doim ham munosiblarga nasib etmasligini tan oldi. Birinchi holatda sovrinni Krishtianu Ronaldu olgan bo‘lsa, ikkinchisida koronavirus tufayli uni topshirmaslikka qaror qilishgan.
