"Manchester Yunayted" va Angliya terma jamoasining sobiq futbolchisi Eshli Yang faoliyatini Chempionshipda davom ettiradi - himoyachi Angliyaning "Ipsvich" klubi bilan shartnoma imzoladi. Bu haqda klub matbuot xizmati o‘z saytida rasman ma’lum qildi.

40 yoshli ingliz bir yil muddatga mehnat shartnomasi tuzdi.

Eslatib o‘tamiz, yozda Eshli Yang shartnomasi yakunlangani sababli "Everton"ni tark etgandi. U "irislar" safida o‘tgan mavsum 36 ta o‘yinda maydonga tushib, 1 ta gol urdi va 3 ta golli uzatmani amalga oshirdi. Yang faoliyatida "Manchester Yunayted" va "Inter" kabi top-klublarda harakat qilgan. Shuningdek, himoyachi Angliya terma jamoasi safida 39 ta o‘yin o‘tkazgan.