Tez orada Italiya A seriyasining yangi mavsumi boshlanadi va Fransiyaning "Marsel" klubidagi 6 oylik ijaradan so‘ng "Milan"ga qaytgan jazoirlik markaziy yarim himoyachi Ismoil Bennaser hamon o‘zi uchun yangi jamoa izlamoqda.
27 yoshli futbolchi Massimiliano Allegri jamoasida o‘ynashni istamayapti, ammo "rossonerilar" va boshqa klublar o‘rtasidagi ehtimoliy transfer bo‘yicha muzokaralar olib borishga bo‘lgan barcha urinishlar hozircha muvaffaqiyatsizlikka uchramoqda.
Ular hatto jazoirlikni Saudiya Arabistoniga jo‘natmoqchi bo‘lishdi, biroq "Al-Ittihod" bilan muzokaralar so‘nggi paytlarda davom etmayapti.
Shu fonda Turkiyaning "Beshiktosh" klubi ham faollashib, "Milan"ga transfer ma’lumotlari bo‘yicha so‘rov yuborib, hozircha javob kutmoqda.
O‘tgan mavsumda Bennaser 20 uchrashuvda jami 1081 daqiqa o‘ynadi va 3 ta golli uzatmani amalga oshirdi.
