"Manchester Siti" bosh murabbiyi Xosep Gvardiola darvozabonlar bilan bog‘liq vaziyat haqida gapirdi. Shanba kuni "shaharliklar" safida Jeyms Trafford debyut qildi, u yozda qadrdon klubiga qaytdi.
"Jeyms uchun juda xursandman. U akademiya o‘yinchisi va hozirda Premyer-ligada debyut qildi. U juda yaxshi o‘ynadi va men juda mamnunman. Menga akademiyadagi yosh futbolchilar "Manchester Siti"da yaxshi o‘ynashlari yoqadi. Bu haqiqatan ham ajoyib," - dedi Gvardiola BBC Radio 5 Live’ga.
Shu bilan birga, Xosep Gvardiola Edersonning klubni tark etishi haqidagi savolga javob bermadi. Braziliyalik futbolchi shanba kuni "shaharliklar"ning qaydnomasida yo‘q edi. Tez orada Ederson "Galatasaroy"ga o‘tishi kutilmoqda.
APL 1-turida "Manchester Siti" "Vulverxempton"ni 4:0 hisobida mag‘lub etdi.













