«Nissa» muxlislari Jim Retkliffning klubdan ketishini talab qilishmoqda.

Yakshanba kuni fransuz klubi muxlislari 2019 yildan beri klub egasi bo‘lgan Ineos kompaniyasi va uning rahbari Jim Retkliffga qarshi onlayn petisiyani ishga tushirdi, deb xabar bermoqda RMC Sport. Muxlislar investorlarning klubga qiziqishi yo‘qligidan va mablag‘ kiritilmayotganidan norozi.

Petisiya matnida Retkliffning o‘tgan yilning mart oyida aytgan so‘zlari eslatib o‘tilgan – Ineos egasi jamoa «juda zaif» bo‘lgani uchun «Nissa» o‘yinlarini tomosha qilmasligini aytgandi. Muxlislarning fikricha, tadbirkor 2023 yilda «Manchester Yunayted» aksiyalarini sotib olganidan so‘ng «Nissa» ishlariga qiziqishni to‘xtatgan.

«Bu fars yetarlicha uzoq davom etdi, Jim Retkliff! «Nissa» aravadagi g‘ildirakni ushlab turadigan gaykaga aylandi. Biz esa - futbolka va chipta sotib oladigan sog‘iladigan sigirlarga... Albatta, ular faqat shuni kutishadi. Transfer oynasi - bu falokat, yo‘nalishsiz, mantiqsiz, shoshqaloqlik bilan.

Imkon qadar tezroq xaridor toping, agar hali topmagan bo‘lsangiz, va keting! Klub bu chidab bo‘lmas yukdan qutulgandan keyingina yutadi», – deyiladi bayonotda.

Petisiya e’lon qilinganidan keyingi birinchi sutkada 1450 ta imzo to‘pladi.

1-turda «Nissa» uyda «Tuluza»ga (0:1) yutqazdi. O‘yindan keyin muxlislar jamoani hushtakbozlik bilan kutib olishdi.

«Bizni petisiyani boshlashga «Tuluza»dan mag‘lubiyat turtki bo‘lmadi. Asosiy sabablar – ko‘plab muxlislardan olgan g‘azab va xabarlar edi. Agar boshida yaxshi narsalar bo‘lgan bo‘lsa, bugun na yo‘nalish, na investisiyalar mavjud.

Retkliff 2023 yilda «Manchester Yunayted»ni sotib olganidan beri, biz uning «Nissa»ga e’tiborsizligini ko‘rmoqdamiz. Uning jamoa o‘yinlarini tomosha qilmasligi haqidagi bayonotlari hurmatsizlik bo‘lib, xavotir uyg‘otdi», – dedi petisiya mualliflaridan biri Loris De Gregorio.