O‘zbekiston Milliy Olimpiya qo‘mitasi va O‘zbekiston futbol assosiasiyasi rahbariyati Angliyaning Manchester shahrida xizmat safarida bo‘ldi. Tashrif doirasida “City Football Group” xolding kompaniyasi va "Manchester Siti" klubi bilan hamkorlik masalalari muhokama qilindi.
Safar davomida o‘zbekistonlik rasmiylar xolding Bosh operasion direktori Rul de Fris, Boshqaruv direktori Denni Uilson, futbol biznesi bo‘yicha bosh direktori Klayv Rivz va boshqa ko‘plab yo‘nalishlar bo‘yicha boshqaruvchilar bilan istiqbolli loyihalarni ko‘rib chiqishdi. Asosiy e’tibor o‘zbek futbolini yangi bosqichga olib chiqishga qaratildi. Xususan, tizimda innovasion yondashuvlar, zamonaviy akademiya tashkil etish, klub infratuzilmasini yaxshilash va xalqaro tajribani joriy etish kabi muhim yo‘nalishlar muhokama qilindi.
O‘z navbatida kompaniya vakillari O‘zbekiston milliy terma jamoasining jahon chempionatiga yo‘l olgani mamlakatimizda futbol rivoji yuqori darajaga chiqayotganidan dalolat berishini, O‘zbekiston milliy terma jamoasi himoyachisi Abduqodir Husanovning transferidan keyin o‘zbek futboliga qiziqish ortganini ta’kidlashdi.
Shuningdek, o‘zbek klublaridan birini “City Football Group” tizimiga integrasiya qilish muzokaralarning asosiy mavzularidan bo‘ldi. Tashrif davomida rasmiylar «Manchester siti« klubining akademiyasi va jamoa tizimi bilan yaqindan tanishishi ko‘zda tutilgan.
