Argentinalik hujumchi Mauro Ikardi maydonda emas, balki sud zalidan katta mag‘lubiyat bilan chiqdi: sobiq turmush o‘rtog‘i Vanda Nara bilan uzoqqa cho‘zilgan nizodan so‘ng unga ulkan aliment to‘lash majburiyati yuklandi, mol-mulki musodara qilindi va hatto qarzdorlar reestriga kiritildi.

Argentina poytaxtida futbolchi Mauro Ikardi va uning sobiq rafiqasi, teleboshlovchi Vanda Nara o‘rtasidagi mashhur sud jarayoni yakunlandi. Sud qaroriga ko‘ra, Ikardiga ikki qizining har biri uchun oyiga 110 ming dollardan aliment to‘lab borishi shart qilib belgilandi.

Shuningdek, sportchining ayrim mulklari hibsga olindi. Jumladan, "Asociacion Civil La Isla SA" kompaniyasi hamda Nordeltadagi elit "Orzular uyi" — Mauro yangi ma’shuqasi, aktrisa China Suares bilan yashagan hashamatli qasr ham musodara qilindi.

Bundan tashqari, Ikardi rasmiy qarzdorlar reestriga kiritildi. Bu qaror og‘ir oqibatlarga olib kelishi mumkin: bank hisoblari va kredit operasiyalari bloklanadi, futbolchi Argentinaga qaytsa, hatto mamlakatdan chiqib ketish taqiqlanishi ehtimoldan xoli emas.

Sud jarayonida Vanda Nara juda ehtirosli nutq so‘zladi. Uning aytishicha, so‘nggi vaqtlarda farzandlarini o‘zi ta’minlab kelmoqda, Ikardi esa katta daromadlariga qaramay, moliyaviy mas’uliyatdan qochishga urinadi.

Mauro uchun bu zarba uning futbolchilik faoliyatining og‘ir davriga to‘g‘ri keldi. Bor-yo‘g‘i bir necha kun oldin u uzoq tanaffusdan keyin ilk bor maydonga tushdi — tizzasiga qilingan murakkab jarrohlik amaliyotidan so‘ng 281 kunlik tiklanish jarayonidan keyin.