Аргентиналик ҳужумчи Мауро Икарди майдонда эмас, балки суд залидан катта мағлубият билан чиқди: собиқ турмуш ўртоғи Ванда Нара билан узоққа чўзилган низодан сўнг унга улкан алимент тўлаш мажбурияти юкланди, мол-мулки мусодара қилинди ва ҳатто қарздорлар реестрига киритилди.

Аргентина пойтахтида футболчи Мауро Икарди ва унинг собиқ рафиқаси, телебошловчи Ванда Нара ўртасидаги машҳур суд жараёни якунланди. Суд қарорига кўра, Икардига икки қизининг ҳар бири учун ойига 110 минг доллардан алимент тўлаб бориши шарт қилиб белгиланди.

Шунингдек, спортчининг айрим мулклари ҳибсга олинди. Жумладан, "Asociacion Civil La Isla SA" компанияси ҳамда Нордельтадаги элит "Орзулар уйи" — Мауро янги маъшуқаси, актриса Чина Суарес билан яшаган ҳашаматли қаср ҳам мусодара қилинди.

Бундан ташқари, Икарди расмий қарздорлар реестрига киритилди. Бу қарор оғир оқибатларга олиб келиши мумкин: банк ҳисоблари ва кредит операциялари блокланади, футболчи Аргентинага қайтса, ҳатто мамлакатдан чиқиб кетиш тақиқланиши эҳтимолдан холи эмас.

Суд жараёнида Ванда Нара жуда эҳтиросли нутқ сўзлади. Унинг айтишича, сўнгги вақтларда фарзандларини ўзи таъминлаб келмоқда, Икарди эса катта даромадларига қарамай, молиявий масъулиятдан қочишга уринади.

Мауро учун бу зарба унинг футболчилик фаолиятининг оғир даврига тўғри келди. Бор-йўғи бир неча кун олдин у узоқ танаффусдан кейин илк бор майдонга тушди — тиззасига қилинган мураккаб жарроҳлик амалиётидан сўнг 281 кунлик тикланиш жараёнидан кейин.