O‘z tarixida ilk marta jahon chempionatida ishtirok etadigan O‘zbekiston milliy jamoasining ayni paytdagi vaqtinchalik bosh murabbiyi Timur Kapadze iste’foga chiqarilib, uning o‘rniga Paulo Bentuni bosh murabbiy etib tayinlanishi mumkinligi haqidagi xabar Xitoy matbuotida umid uchqunlarini uyg‘otdi.

Boisi, bu mamlakat matbuoti Xitoy terma jamoasini aynan Timur Kapadze boshqarishini istamoqda.

Xitoyning Sohu.com sayti quyidagi yozdi:

«Agar Bentu Kapadze o‘rniga tayinlansa, bu biz uchun katta imkoniyat. Shunda Kapadze Xitoy uchun yaxshi nomzod bo‘lishi mumkin.

Kapadze 2025 yil yanvar oyida O‘zbekiston termasiga bosh murabbiy bo‘lib kelgan va yaxshi natijalar ko‘rsatgan. So‘nggi 4 o‘yinda 2 ta g‘alaba va 2 ta durang qayd etgan. Eng muhimi, u O‘zbekistonni tarixda ilk bor Jahon chempionatiga olib chiqdi.

Xitoy uchun esa Kapadze yaxshi nomzod hisoblanadi. Avvalo, 40 yoshlardagi yosh murabbiy sifatida Osiyoda yaxshi natijalar ko‘rsatdi. Yoshlar jamoasi bilan ham Osiyoning yuqori pog‘onasiga ko‘tarildi. Osiyoda tajribasi va muvaffaqiyati bo‘lgan murabbiyni Xitoy rad etishiga sabab yo‘q.

Biz hali bosh murabbiy tayinlamadik. Agar Xitoy futbol assosiasiyasi xorijlik murabbiyni tanlasa, Kapadze ideal nomzod bo‘lishi mumkin.

Kapadze 40 yoshning boshlarida. Bu esa Xitoy futbol assosiasiyasining yosh mezonlariga mos keladi. Shu bilan birga, u Osiyo futboliga yaxshi tanish va saralashda natija ko‘rsatgan. Endigina murabbiylik karyerasini boshlagani sabab maoshi ham yuqori emas. Shu uchta afzallik uni Xitoy uchun kuchli nomzodga aylantirishi mumkin.

Ayni paytda, Xitoy Jahon chempionatiga chiqolmaganidan so‘ng, Xitoy bosh murabbiy Branko Ivankovichni ishdan oldi va hali ham yangi murabbiy izlamoqda. Bir nechta nomzod tilga olingan bo‘lsa-da, ulardan hech biri jiddiy natija bermadi».