Ўз тарихида илк марта жаҳон чемпионатида иштирок этадиган Ўзбекистон миллий жамоасининг айни пайтдаги вақтинчалик бош мураббийи Тимур Кападзе истеъфога чиқарилиб, унинг ўрнига Пауло Бентуни бош мураббий этиб тайинланиши мумкинлиги ҳақидаги хабар Хитой матбуотида умид учқунларини уйғотди.

Боиси, бу мамлакат матбуоти Хитой терма жамоасини айнан Тимур Кападзе бошқаришини истамоқда.

Хитойнинг Sohu.com сайти қуйидаги ёзди:

«Агар Бенту Кападзе ўрнига тайинланса, бу биз учун катта имконият. Шунда Кападзе Хитой учун яхши номзод бўлиши мумкин.

Кападзе 2025 йил январь ойида Ўзбекистон термасига бош мураббий бўлиб келган ва яхши натижалар кўрсатган. Сўнгги 4 ўйинда 2 та ғалаба ва 2 та дуранг қайд этган. Энг муҳими, у Ўзбекистонни тарихда илк бор Жаҳон чемпионатига олиб чиқди.

Хитой учун эса Кападзе яхши номзод ҳисобланади. Аввало, 40 ёшлардаги ёш мураббий сифатида Осиёда яхши натижалар кўрсатди. Ёшлар жамоаси билан ҳам Осиёнинг юқори поғонасига кўтарилди. Осиёда тажрибаси ва муваффақияти бўлган мураббийни Хитой рад этишига сабаб йўқ.

Биз ҳали бош мураббий тайинламадик. Агар Хитой футбол ассоциацияси хорижлик мураббийни танласа, Кападзе идеал номзод бўлиши мумкин.

Кападзе 40 ёшнинг бошларида. Бу эса Хитой футбол ассоциациясининг ёш мезонларига мос келади. Шу билан бирга, у Осиё футболига яхши таниш ва саралашда натижа кўрсатган. Эндигина мураббийлик карьерасини бошлагани сабаб маоши ҳам юқори эмас. Шу учта афзаллик уни Хитой учун кучли номзодга айлантириши мумкин.

Айни пайтда, Хитой Жаҳон чемпионатига чиқолмаганидан сўнг, Хитой бош мураббий Бранко Иванковични ишдан олди ва ҳали ҳам янги мураббий изламоқда. Бир нечта номзод тилга олинган бўлса-да, улардан ҳеч бири жиддий натижа бермади».