“Milan” yarim himoyachisi Yasin Adli faoliyatini Fransiya chempionatida davom ettirishi mumkin, deya xabar bermoqda jurnalist Nikolo Skira.

Manbaga ko‘ra, nomi oshkor etilmagan ikki klub 25 yoshli fransiyalik xavbekka qiziqmoqda. Klublar allaqachon uning vakillari bilan muzokaraga kirishgan.

Adli 2021 yilning yozidan beri “rossonerilar” safida to‘p suradi. “Milan” o‘sha yili futbolchini “Bordo”dan 9 million yevro evaziga sotib olgandi.

O‘tgan mavsumda u “Fiorentina”da ijara asosida o‘ynab, klub safida barcha turnirlarda 35 ta o‘yinda maydonga tushib, 5 ta gol urdi va 7 ta golli uzatmani amalga oshirdi.