Mamlakat milliy chempionati – futzal bo‘yicha Oliy liga bahslari boshlanishiga to‘rt kun qoldi. XXIX milliy chempionat yangi tuzilgan O‘zbekiston futzal federasiyasi shafeligi ostida o‘tkaziladi. 2025/2026-yilgi mavsum Oliy liga musobaqasida 12 ta jamoa ishtirok etadi. Bular – BMB (Jizzax), “Oil Star” (Buxoro), “Lokomotiv” (Toshkent), OKMK (Olmaliq), “Bunyodkor” (Toshkent), “Maksam-CHirchiq” (Toshkent viloyati), “Dinamo” (Samarqand), “Nasaf” (Qarshi), “Surxon” (Termiz), SQB (Toshkent), “Qizilqum” (Navoiy) va “Neftchi” (Farg‘ona) jamoalaridir.

Yangi mavsumga tayyorgarlik ishlari avjida. Aksariyat ishlar futzal sohasida ilk marta tashkillashtirilmoqda: birinchi marta futzal chempionatining introsi tayyorlanyapti, birinchi marta jamoalar fotosessiyadan o‘tkazilmoqda, birinchi marta chempionatning barcha uchrashuvlarini O‘FFning YouTube kanalidan, jonli efirda, sharhi bilan uzatish harakatidamiz...

Ertaga Oliy liga jamoalari uchun muddati o‘n kunga uzaytirilgan xorijlik o‘yinchilarni qo‘shib olish transfer oynasi yopiladi. Ayni paytda Liganing 12 ta futzal jamoasidan 8 tasida legioner o‘yinchilar bor. Mavsum uchrashuvlari juda murosasiz, keskin kurashlar ostida o‘tishi kutilyapti. Chempionlik, sovrinli o‘rinlar uchun kurashadigan jamoalar soni oshgan.