Мамлакат миллий чемпионати – футзал бўйича Олий лига баҳслари бошланишига тўрт кун қолди. ХХIХ миллий чемпионат янги тузилган Ўзбекистон футзал федерацияси шафелиги остида ўтказилади. 2025/2026-йилги мавсум Олий лига мусобақасида 12 та жамоа иштирок этади. Булар – BMB (Жиззах), “Oil Star” (Бухоро), “Локомотив” (Тошкент), ОКМК (Олмалиқ), “Бунёдкор” (Тошкент), “Максам-Чирчиқ” (Тошкент вилояти), “Динамо” (Самарқанд), “Насаф” (Қарши), “Сурхон” (Термиз), SQB (Тошкент), “Қизилқум” (Навоий) ва “Нефтчи” (Фарғона) жамоаларидир.

Янги мавсумга тайёргарлик ишлари авжида. Аксарият ишлар футзал соҳасида илк марта ташкиллаштирилмоқда: биринчи марта футзал чемпионатининг интроси тайёрланяпти, биринчи марта жамоалар фотосессиядан ўтказилмоқда, биринчи марта чемпионатнинг барча учрашувларини ЎФФнинг YouTube каналидан, жонли эфирда, шарҳи билан узатиш ҳаракатидамиз...

Эртага Олий лига жамоалари учун муддати ўн кунга узайтирилган хорижлик ўйинчиларни қўшиб олиш трансфер ойнаси ёпилади. Айни пайтда Лиганинг 12 та футзал жамоасидан 8 тасида легионер ўйинчилар бор. Мавсум учрашувлари жуда муросасиз, кескин курашлар остида ўтиши кутиляпти. Чемпионлик, совринли ўринлар учун курашадиган жамоалар сони ошган.