"Ovyedo" muxlisi Kilian Mbappe va Vinisiusga nisbatan irqchilik qilgani uchun jarimaga tortildi.
24 avgust kuni La Liga 2-turidan o‘rin olgan bahsda "Real" safarda "Ovyedo"ni mag‘lub etdi (3:0). O‘yin davomida mezbonlar muxlislaridan biri "Madrid" futbolchilari Kilian Mbappe va Vinisiusga nisbatan irqchilik ruhidagi haqoratli so‘zlarni aytgan. Muxlis 37-daqiqada Mbappening golidan keyin imo-ishoralar va tovushlar bilan maymunni tasvirlagan.
Zo‘ravonlikka qarshi kurash bo‘yicha davlat komissiyasi muxlisga 4 ming yevro jarima solish va 12 oyga sport ob’ektlariga borishni taqiqlash taklifini ma’qulladi.
Shu bilan birga, tergov sudi tomonidan tergov harakatlari davom etmoqda. Ayblanuvchi shaxsga uch yilgacha qamoq jazosi tahdid solmoqda.
