Superliganing 22-turidan o‘rin olgan “Buxoro” – “Navbahor” (5:0) uchrashuvidan keyipgi matbuot anjumanining birinchi qismida mehmonar bosh murabbiyi Sergey Lushan ishtirok etib, OAV xodimlarining savollariga javob berdi.
“Lochinlar” ustozi odatdagidek, o‘z so‘zini o‘yin haqidagi fikrlari bilan boshladi.
– Uchrashuv borasida nima deyishim mumkin, biz 0:5 hisobida mag‘lubiyatga uchradik. Bahsning 1-bo‘limini juda rasvo o‘tkazdik. Natija haqqoniy, boisi, himoyani o‘ylamay, futbol o‘ynalsa, natijasi shunday bo‘ladi. Balki, o‘z darvozamizdan 6 ta to‘p o‘tkazishimiz ham mumkin edi. Raqibni g‘alaba bilan tabriklayman. Jamoamizda har tomonlama muammolar yetarli: qarzdorlikdan tortib, shartnomalargacha. O‘ylaymanki, yaqin orada jamoaga e’tibor qaratilib, vaziyat yaxshi tomonga o‘zgaradi. To‘g‘risini aytsam, ba’zi o‘yinchilarimiz uchun mavsum tugadi. Chunki ular jamoa uchun emas, jamoaga qarshi futbol o‘ynashyapti. Vaziyatni o‘zgartirishga harakat qilyapmiz, lekin o‘xshamayapti.
- O‘zPFL tomonidan e’lon qilingan uchrashuv statistikasini ko‘rganimizda, “Navbahor” “Buxoro”dan ko‘p jihatlar bo‘yicha oldinda ekanligi ko‘rindi. Lekin tablodagi hisob buning aksi bo‘ldi. Nima, jamoangiz o‘ynashni xohlamadimi?
- Yana qaytarib aytaman, bugungi o‘yindan keyin yarim jamoa a’zolari uchun mavsum tugadi. Chunki ba’zilar bugun raqib foydasiga harakat qilishdi. Men buni boshqacha tushuntirib bera olmayman. Hammasini tahlil qilamiz.
- “Buxoro”dan shunday qarshilik kutganmidingiz?
- Qanday qarshilik haqida gapiryapsiz? Biz o‘zimizga o‘zimiz beshta gol olib keldik. Agar hassaga tayangan kampir maydonga chiqsa ham oltita gol urardi. Albatta, oson bo‘lmasligini bilardik, raqibni hurmat qilamiz. Lekin o‘yinni ko‘ring, faqat o‘zimiz yutqazdik.
- Tezkor gollar ham o‘yinga o‘z ta’sirini o‘tkazdimi?
- Yana qaytaraymi? Bizda bugun maydonda faqat uch kishi futbol o‘ynadi. Yettita o‘yinchimiz umuman o‘ynamadi. To‘g‘ri, qarzdorlik bor, balki boshqa klublarda ham bordir. Jamoa uchun o‘ynamaslik bugun boshlangani yo‘q. Ikkinchi davra boshlanibdiki, jamoaga qarshi o‘ynash davom etyapti. Nimalar bo‘layotganini tushunmayapman. Birinchi davradagi jamoadan asar qolmagan.
