"Barselona" yarim himoyachisi Gavi o‘ng tizzasining menisk qismida jarrohlik amaliyotini o‘tkazdi, deya xabar berdi kataloniyaliklar matbuot xizmati. Xavbek taxminan 5 oyni o‘tkazib yuboradi.
"Gaviga medial menisk jarohati uchun artroskopiya o‘tkazildi. Meniskni saqlab qolish uchun chok qo‘yildi. Tiklanish vaqti taxminan 4-5 oy deb baholanmoqda," - deyiladi klub bayonotida.
Avvalroq, 21 yoshli ispaniyalik futbolchi 2023 yilda xochsimon bog‘lamlari uzilganidan keyin o‘ng tizzasida og‘riq his qilgan.
Gavi 2025/26 yilgi mavsumda 2 ta o‘yinda maydonga tushdi va 1 ta golli uzatmani amalga oshirdi. Keyin u "Rayo Valyekano"ga qarshi o‘yinni va Ispaniya terma jamoasining JCH-2026 saralashidagi o‘yinlarini o‘tkazib yubordi.
