"Tottenxem" bosh murabbiyi Tomas Frank o‘z jamoasida Xarri Keynni ko‘rishni istayotganini aytib, mish-mishlar oloviga moy sepdi. "Bavariya" sport direktori Maks Eberl bu borada izoh berdi.

"Xarri g‘alaba qozonishni va unvonlarni qo‘lga kiritishni xohlaydi va u buni biz bilan qila oladi. Biz Xarri bilan katta muvaffaqiyatlarga erishmoqchimiz," - deya Eberlning so‘zlarini keltiradi Goal portali.

Avvalroq, matbuotda Keynning shartnomasida "Tottenxem"ni sotib olish bo‘yicha maxsus opsiya borligi haqida yozishgandi. Xarri 2023 yilning avgustida London klubidan "Bavariya"ga o‘tgandi. O‘shandan beri hujumchi myunxenliklar safida 103 ta o‘yin o‘tkazib, 98 ta gol urgan va sheriklariga 29 ta golli uzatmani amalga oshirgan.