Ispaniya terma jamoasi bosh murabbiyi Luis de la Fuente jamoa hujumchisi Lamin Yamal haqida fikr bildirdi.
Eslatib o‘tamiz, sentyabr oyida Yamal Ispaniya terma jamoasi safida jarohat olib, "Barselona"ning bir nechta o‘yinlarini o‘tkazib yuborishga majbur bo‘lgandi.
"Men har doim haqiqatni aytaman. Futbolda biroz noqulaylik yoki og‘riq bilan o‘ynash odatiy hol. O‘yin davomida u hech narsadan shikoyat qilmadi, faqat keyinroq shifokorlar mendan ko‘ra yaxshiroq tushuntira oladigan bir narsani his qildi. Bu shunchaki futbol voqeligi - g‘ayrioddiy narsa emas," - deya de la Fuentening so‘zlarini keltiradi Barca Universal.
Yamal Ispaniya terma jamoasi safida 23 ta o‘yinda maydonga tushib, 6 ta gol urgan va 12 ta golli uzatmani amalga oshirgan.
11 va 14 oktyabr kunlari Ispaniya terma jamoasi JCH-2026 saralash bosqichi doirasida mos ravishda Gruziya va Bolgariyaga qarshi o‘yin o‘tkazadi.
