Argentina va Puerto-Riko terma jamoalari o‘rtasidagi o‘rtoqlik uchrashuvi avval Chikagoda o‘tkazilishi rejalashtirilgan edi, ammo u Floridaga ko‘chirildi. Bu haqda AP agentligi xabar berdi.

Manbaning ma’lumotiga ko‘ra, qaror AQSH prezidenti Donald Trampning Chikago shahri atrofiga milliy gvardiya bo‘linmalarini yuborib, mamlakatdagi muhojirlik siyosatini keskinlashtirishga qarshi bo‘lgan namoyishlarni bostirish haqidagi harakatidan so‘ng qabul qilingan.

Ma’lum qilinishicha, avval 14 oktyabr kuni Chikagodagi «Soldier Field» stadionida o‘tkazilishi kerak bo‘lgan uchrashuv endi Fort-Loderdeyl shahridagi «Chase Stadium» maydonida bo‘lib o‘tadi. Ilgari o‘yinning ko‘chirilishiga sabab sifatida chiptalarning past sotilishi haqidagi versiya ham tilga olingan edi.

Joriy yilning kuzida Chikagoda 1000 dan ortiq muhojir qo‘lga olingan. Tramp ma’muriyati milliy gvardiyani noqonuniy muhojirlarni tezroq deportasiya qilish uchun jalb etish rejasi haqida ma’lum qilganidan so‘ng shaharda norozilik namoyishlari boshlangan.