"Chelsi"da "Manchester Yunayted" yarim himoyachisi Kobbi Maynuga qiziqish saqlanib qolmoqda.
20 yoshli futbolchi o‘tgan transferlar davrida ijaraga ketmoqchi edi, ammo "qizil iblislar" rahbariyati uni qo‘yib yubormadi. O‘shandan beri inglizning ketishi haqidagi gap-so‘zlar tinmagan va unga da’vogarlardan biri "Chelsi" ekani aytilgandi. TEAMtalk tarqatgan xabarga ko‘ra, londonliklar hamon Maynuni kuzatib bormoqda. "Ko‘klar" qishda xavbekni o‘z safiga qo‘shib olishga urinmasalar kerak, ammo mavsum yakunlangach, o‘z oldilariga bunday maqsadni qo‘yishlari mumkin, deydi manba.
Transfermarkt portali Kobbi Maynuning narxini 50 mln yevroga baholamoqda. Joriy mavsumda futbolchi 6 marta maydonga tushib, 1 ta golli pas muallifi bo‘ldi.
